Suba Service: Amang’ana Amayia Kuwimpi 4th June 2020

Ekialo ekia Kenya kitukire awalwire awaera mia kilala na amakumi awiri ni wane awa owulwire owua COVID-19 kuiwaga eria enyinga eziera makumi awari ni inee eziamire okuwita nokutusia iwala eria awalwire awo mukialo okutuka elfu wiwiri mia wisatu  ni makumi anee.

Okulondekana ni ing’ana okuema ku omwaziri owa omugawo ogwa owulamu Omw.Mutahi Kagwe aworre mbwa awalawire awangi waemre mukaunti eya Mombasa nelondwako ne ekaunti eya Nairobi eno ne ekaunti eya Busia ewaa eya kusatu.Kuiwaga erio riona asaongre okuwola mbwa ewimega ewiera elfu makumi mnane ni msamvu mia mkaga ni makumi ekienda ni mnane wimire okurengwa okutanika emirimo gino gitanike mukailo muno.

Asongre okuwola mbwa ekaunti eya Elgeyo Marakwet etorre iwaga eria okuingira agati eya ekaunti  ezimire okutukrwamo  na awalwire  kuwuire owua rero.

Omwaziri owa omugawo ogwa owurinzi owulungi mukialo omkaye Monica Juma amire okurega ino ing’ana eria okuisonga okwa owutaka owua igerera  nikuambane na awakangasi awa owurinzi owulungi awa mukialo muno.Nalonzia kuiwaga eria emigomo egia makumi asatu ni itanu egia okuana amantu ku awakangasi awo mukisagia ekia Karen kuwuire owua rero  ,omkaye Juma aworre mbwa wurio owuene owua okureta alala okwa awakangasi awo okuema muwialo ewia Afrika kiema engira eya okuwona mbwa watukire igerera ilungi.

Asongre okuwola mbwa entambuko eno yona ewarra okuza okutiriginyia emirimo egikolwa na awakangasi awa owurinzi owulungi awo mukialo ekia Kenya ni ekisagia ekia Afrika ekilamba.

Lilian Ojwang.


Leave a Reply

Your email address will not be published. Required fields are marked *